Елено ќерко, Елено

Музичка фолк сликовница за деца, новина во детското издаваштво, со уникатност по својот концепт. Спој на македонското народно музичко творештво и македонската ликовна уметност. Инспирација од познатата и популарна, македонска народна песна, „ЕЛЕНО ЌЕРКО,ЕЛЕНО“, која на страниците на сликовницата е мелографирана и обработена од долгогодишен музички педагог Славејко Гиразов, исполнувајќи ги целите, да биде прифатлива и со текст и тема за децата. Целта е да се даде придонес кон зачувување на македонското музичко културно наследство и фолклорното творештво и тоа да им се понуди на децата во една форма, која ќе биде прифатлива за нив, за да го засакаат и продолжат да го негуваат, како наше национално богатство. Но, децата да спознаваат и нови естетски содржини, преку ликовните дела, со што ќе се воспитуваат и ќе градат култура на вредности. Сликовницата на своите страници го содржи текстот на песната и нотни записи за истата, распоредени според строфите на страниците. Авторот, Душко Георгиевски, преку оваа сликовница, ја исполнува својата мисија, народната македонска песна, да стигне до што поголем број на деца, да ја учат и да стане дел од нивниот културен идентитет.Сликовницата е уникатна по својот колорит од илустрации.Од уметничките авторски дела на академскиот сликар Горан Боев, за убавата мома Елена, до останатите, кои го пресликуваат текстот на истоимената народна песна, со цел да овозможат таа да се доживее подобро кај децата.На страниците на сликовницата има и едукативен дел, боенка за учење на народните инструменти и дел за учење да се свири песната. Со тоа, оваа сликовница добива уште поголема вредност, од едукативен,образовен и естетско-уметнички карактер.