Евхаристија

Евхаристија е врвно достигнување на о. Александар Шмеман. Таа е одраз на целокупното животно искуство на овој голем познавач на литургијата, како и на неговите мисли за божествената литургија - централниот чин на самореализирање на Црквата. Според о. Шмеман постои само едно нешто што е потребно, а тоа е она што се извршува кога Црквата се собира заедно, како Христово тело, за да влезе во Царството, за се издигне до небото и да земе учество на Господовата трпеза во Неговото царство. Но за да можеме правилно да ја „читаме“ литургијата, мораме да ја гледаме како единствена, интегрална целина. Секое поглавие во текот на книгата го носи насловот „света тајна“. Света тајна на Собранието, Света тајна на Влезот, Света тајна на Словото, Света тајна на Приносот, Света тајна на Анафората, Света тајна на Светиот Дух. Тој не го користи овој збор за да направи сѐ „посвечено“, туку за да покаже дека секој дел од литургијата е неопходен и дека евхаристијата не може да се сведе само на еден „момент“ без разлика дали се тоа зборовите или установата на епиклезата. Секој дел е света тајна (како што мислеше о. Шмеман, целиот свет е света тајна) којшто се надоврзува и настанува од претходниот дел и го претпоставува и води кон следниот. Човекот е создаден заради единство, за вера, за лубов... Сево ова ни го соопштува евхаристијата, а целта за оваа книга е да на помогне исто да го слушнеме и разбереме.