Играме, растеме

„Играме, растеме“ е збирка куси драмски форми, едночинки, поделена на два дела – „Семеен театар“ и „Театарот на Дарко“. Главните ликови се деца кои се наоѓаат во секојдневни ситуации. Токму затоа им се блиски на читателите кои можат да се препознаат во нив и лесно да ги играат на сцена. Едночинките се едноставни за поставување во домашни услови (креативно поминато слободно време), но и во градинките и училиштата, со или без повод. Освен за сценска постановка и читање на текстот во улоги, овие едночинки се соодветни за анализа на часовите по македонски јазик и за запознавање со спецификите на овој вид драмска форма. Меѓу дијалозите и проблемските ситуации суптилно е вметната едукативна компонента со цел да се поттикнат децата да размислуваат и креативно да се изразуваат. Дејството почнува среде одредено случување – in medias res – и мошне брзо преоѓа на конкретниот проблем, изнесувајќи јасна идеја и недвосмислена поента. Тематски разновидни и со широк опфат на контексти, овие куси текстови се заокружување на драмското творештво на Димовски и се придонес во збогатувањето на македонската книжевност со оваа ретко застапена прозна форма.