Остров во морето

Понекогаш едноставното е премногу тешко... но секогаш треба да го направиме најдоброто што можеме. Сестрите Стефи и Нели, на дванаесет и на седумгодишна возраст, се на пат кон остров крај Гетеборг, Шведска, за да го избегнат прогонот на Евреите во нивната родна Австрија. Во Виена се разделиле од родителите, а Стефи им ветила дека ќе се грижи за помалата сестричка. На бродот што ќе ги однесе во новиот дом, Стефи ѝ опишува на Нели што ги чека таму: одморалиште со палми крај морското шеталиште, песочни плажи со лежалки и продавачи на сладолед, пијано и куче во новиот дом. Сонуваат за рај, но ги среќава сурова реалност. Им се чини дека живеат на крајот на светот, каде што смрди на риба и никој не го зборува нивниот јазик. Околу нив има само море и карпи, рибарски колипки и чамци, врсници кои ги избегнуваат... „Мила мамо, дојди и земи нè. Овде не можам да живеам...“, ѝ пишува Стефи на мајка си. Но не го праќа тоа писмо. Не само затоа што не сака да ја загрижува мајка си, туку и сфаќа дека мора да се навикнат на новото место и на новото училиште, мора да го научат јазикот и уште куп нови работи, ако сакаат да преживеат. А додека ја очекуваат новата средба со родителите, која сè повеќе се одолжува, Стефи и Нели постепено се сродуваат со жителите на малиот остров...