Авторскиот тандем Грир Хендрикс и Сара Пеканен во својата нова книга „Не си сама“ повторно „носат“ неверојатен, неочекуван психолошки трилер, што годинава влезе и во потесниот избор во категоријата „најдобра мистерија и трилер“ на најчитаната интернет-страница за книги „Гудридс“ (goodreads.com). Овој роман сега е преведен и на македонски јазик во издание на „Арс Либрис“, дел од „Арс Ламина – публикации“, и е достапен во книжарниците на „Литература.мк“, а може и да се нарача онлајн на следниот линк. Покрај ова издание од писателската двојка, на нашиот јазик веќе може да се прочита и книгата „Анонимна девојка“.
![](https://www.literatura.mk/files/images/slike_clanaka/description/16403/fb.jpg?w=1000)
Шеј Милер сака да најде љубов, но таа ја заобиколува. Сака да биде исполнета, но нејзината работа оди кон ќор-сокак. Сака да припаѓа некаде, но нејзиниот живот станува сè повеќе осамен.
Тогаш Шеј ги сретнува сестрите Мур. Касандра и Џејн живеат гламурозен и совршен живот и секогаш го добиваат она што го сакаат. Кога ќе ја внесат Шеј во нивниот круг на познајници, сè изгледа подобро. Шеј би умрела за тие да ја прифатат, а можеби и ќе мора да го направи тоа...
Во интервјуто што Хендрикс и Пеканен го дадоа за blog.literatura.mk во јули минатата година дадоа и мало објаснување зад главниот лик во „Не си сама“.
‒ Кога почнавме да пишуваме заедно, знаевме дека сакаме да креираме комплексни женски карактери со кои читателите лесно ќе се поврзат. Двете студиравме психологија и сме љубопитни студенти на човечкиот ум. Слушаме многу психолошки поткасти, претплатени сме на „Психологијата денес“ (Psychology Today) и читаме нефикција што вклучува психолози, на пример, „Можеби треба да разговараш со некого“ (Maybe You Should Talk to Someone) на Лори Готлиб и „Добро утро, чудовиште“ (Good Morning, Monster) на Кетрин Гилдинер. Толку многу ја сакаме психологијата што главниот наратор во романот „Анонимна девојка“ е психијатар – истакнаа двете авторки.
Хендрикс и Пеканен продолжуваат да пишуваат, а дел од нивните дела се веќе во подготовка да се екранизираат.