.jpg)
Нема кој не слушнал за ексцентричниот и остроумен Шерлок Холмс, единствен во својата хистерија да го реши секое злосторство, ракувајќи со сиромашните форензички ресурси, пркосејќи и на недоволната заангажираност на полициските службеници.
Оваа „папка“ со документирани случаи кои ги разрешил Шерлок Холмс се состои од 13 раскази неповрзани меѓусебе, во кои Артур Конан Дојл уште еднаш, но можеби најсилно во своето творештво ја докажува уникатноста на неговите идеи кои се косат со логиката, па и менталната гравитација. Шерлок Холмс со шарм и екстраваганцијата на високата класа се втурнува во клучалки претесни за стандардниот човечки капацитет. Дури и кога се појавува анимозитетот на околината тој точно знае кој механизам да го подмачка за да го издејствува конечниот одговор. Притоа ги предвидува реакциите на инволвираните и се повикува на реплики што долго потоа се цитираат.
Раскажана низ перспективата на Вотсон, верниот придружник и социјалниот бастун на детективот со главата во облаци, дејството е сместено некаде по исчезнувањето на Холмс од светот на елитните детективи, тогаш кога професорот Моријарти го носи речиси во смрт. Како единствен човек на кого ја полага целата доверба тој му ја разоткрива слепата вистина пред повторно да се втурне во водите кои најдобро ги познава-војната со злосторничките умови.
„Напуштената куќа“ е расказ кој на читателот му ја обелоденува носталгијата за врелиот и непопустлив темперамент на Шерлок Холмс, проследен со неговиот брз и дедуктивен ум, но и амбиентот кој Конан Дојл непогрешно го создава во секое пишано парче од својата уметност. Фрапантна е и загонетката скриена зад ѕидовите на „Приоритатското училиште“, но и горчината што се пени како бран во карпест масив по крајбрежјата на Северното Море во расказот “Црниот Пeтaр”.
Доколку не сакате да се ангажирате со долга проза, а од друга страна ви недостасува предизвик што ќе ги разбранува мозочните вијуги, кој ќе ве остави подзинати на секои десеттина страници да ги преиспитувате методите на Холмс и Вотсон, но и да ги профилирате можните сомнителни лица, тогаш препуштете се на ова сензационално дело. Иако напишана во периодот помеѓу 1903-1904, а публикувана во 1905, Шерлок Холмс има децениски стаж на омилен книжевен и телевизиски детектив.
