На денешен ден, 21 септември, во 1947 година е роден кралот на хоророт – Стивен Кинг. Тој е автор на повеќе од 65 книги продадени во над 350 милиони примероци и добитник на десетици награди. Негов најпознат роман е „Сјаење“, кој беше екранизиран од страна на Стенли Кјубрик.
Славниот писател на хорор-приказни Стивен Кинг открива што го инспирирало да го напише продолжението на култниот филм „Сјаење“, снимен во 1980 година. Иако вообичаено не пишува продолженија, сепак долго не можел да го заборави главниот лик од споменатиот филм, момчето по име Дени. Затоа решил да ја расветли неговата понатамошна судбина.
„Сјаење“ е приказна за писател кој со семејството оди во планински хотел за да работи како чувар на хотелот надвор од сезоната. Исто така, планира да напише книга во тишината на напуштениот објект. Меѓутоа, наместо тоа, тој станува опседнат со намерата да ги убие сопругата и синот Дени.
Идејата за пишување на книгата „Сјаење“ Кинг ја добил кога бил на дводневен одмор со својата жена на планините Колорадо, во празен хотел, на крајот од туристичката сезона. Морничавиот ветер што дувал надвор и пустошот во хотелот претставувале одличен поттик за фантазијата на авторот.
„По вечерата, додека се враќав во собата, поминав покрај противпожарното црево во ходникот и си помислив, што би се случило она да се претвори во змија и да почне да ме брка? До моментот кога стигнав во собата, во главата практично ја имав цела приказна“, изјави Кинг.
Книгата е екранизирана во 1980 година во режија на Стенли Кјубрик, со Џек Николсон во главната улога.
Меѓутоа, во продолжението Кинг повторно го оживува ликот на Дени Торенс, сега веќе возрасен човек заробен од очај и алкохолизам, кој ги користи своите паранормални способности за да им помогне на оние што умираат. Но, во моментот кога ќе сретне со некој сличен нему, дете со телепатски способности, неговото минато повторно се отвора.
Како Кинг, кој и самиот бил алкохоличар, да го отвора сопственото минато, со тоа што решил да го продолжи литерарниот живот на Дени. Тој вели: „Бев љубопитен, а тоа не ми се случува толку често. Почувствував како ликот на Дени се формира во мојата глава. Го почувствував тоа затоа што зависноста е нешто што е во гените на семејството. Помислив да продолжам и да му дозволам да биде алкохоличар за да видам дали може да биде подобар од својот татко“.
За разлика од „Сјаење“, приказна што од многумина е сметана за една од најстрашните приказни, во „Доктор Сон“, Кинг читателите ги соочува со многу поконкретни ужаси, каков што е болеста, бидејќи реалноста може да биде пострашна од приказните за паранормални појави. Самиот Кинг изјави: „Се плашам од Алцхајмерова болест. Намалувањето на менталните способности е нешто што навистина ме вџасува“.
„Клучот е во тоа да создадете ликови за кои луѓето ќе се грижат. Доколку се грижите за нив, а тие се во опасност, вие се плашите заедно со нив“, изјави Кинг.
Издавачката куќа „Арс Ламина“ досега ги објави следните книги од Стивен Кинг: „Сјаење“, „Доктор Сон“, „Кери“, „Тркачот“, „Колку покрваво“, „Подоцна“ и серијалот „Зелената милја“.
Книгите на Стивен Кинг се достапни во сите поголеми книжарници, во „Литература.мк“, како и онлајн на следниот линк:
| https://www.literatura.mk/link/JqJ6M1V0i9 |
