На местото каде што даунлоудот станува пиратерија, љубовта измама, а вистината – PR, двајца луѓе се во потрага по излезот од љубовниот триаголник. Во таа потрага се разрешуваат нивните човечки и деловни судбини, а скриените, забранетите и потиснатите чувства од емоционалното подземје излегуваат на чистина.
Дејството на романот во еден дел се одвива во елитна белградска PR-агенција, а во другиот – на интернет: од обичното флертување и размената на сличните задоволства на Facebook или на Twitter, до најмистериозните пространства на Deep Web, каде што е можно да се изнајмат Rent-A-Hacker услуги или да се порача нечие убиство.
Александар Илиќ (1981), прозен писател. Коавтор е на романот Српскиот психо (2007, Лагуна) – изданието на полски јазик Serbski psycho (2011, Краков). Работел во маркетинг-агенцијата Мекен Ериксон во Белград и пишувал за Плејбој, Сити магазин, Данас, Нови магазин, Траблмејкер... Во моментов работи во српската издавачка куќа Лагуна. „PR“ е неговиот прв самостоен роман.