Е-адреса: Лозинка:
















  • 30.03.2018
    „Литература.мк“ и „Арс Ламина“ на Саемот на книгата 2018

    „Литература.мк“ и „Арс Ламина“ и оваа година ќе бидат дел од Саемот на книгата, чиешто 30. јубилејно издание ќе се одржи во ВИП Арената во СЦ „Борис Трајковски“ од 3 до 9 мај.

    „Литература.мк“ и издавачката куќа „Арс Ламина“ ќе се претстават со многу нови наслови, промоции на нови книги и специјални гости, попусти до 70%, како и многу изненадувања. Како и досега, на штандот ќе можат да се најдат огромен број наслови од белетристиката, литературата за деца, како и стручната литература. Посебно место е издвоено за литературата за деца, која, благодарение на „Либи“ како импринт на „Арс Ламина“, е во постојан подем последните неколку години. Од детските изданија, оваа и кон крајот на минатата година се родија многу нови наслови, од кои ги издвојуваме „Аги и Ема“ на Игор Коларов, „Сакам дома“ на Јасминка Петровиќ, серијалот „Исидора Мун“, „Кифличката Мирна“ и „Мојот брат од тринаесеттиот кат“ од Оливера Ќорвезироска, „Мистериозното јајце“ од Оливер Коларевски, „Мали огласи“ од Дејан Алексиќ, најновата сликовница „Ѕвездено дете“ од Ване Костуранов и многу други.

    Специјален гостин на „Арс Ламина“ во текот на саемските денови ќе биде најпродаваниот автор за деца во Србија – Урош Петровиќ, кој, покрај промоцијата на серијалот на македонски „Загадочни приказни“, ќе одржи и неколку едукативни работилници со деца.

    Во петок, на 4 мај во 18 часот, гостува авторот Владимир Плавевски со промоција на неговата нова книга „Динга Стоп: Скопски приказни од Ново маало“, збирка во која, како што кажува самиот наслов, се зборува за носталгичните и емотивни реминисценции за едно одамна минато време и за едно невино детство изгубено во маалскиот амбиент.

    По Плавевски, на 4 мај гостува и авторот на добропознатиот готвач „Гответе насмеани“ – Давор Панчевски, уште попознат како Dave’s Kitchen, каде што следува потпишување од 19 часот.

    Во сабота, на 5 мај, во 13 часот ќе се одржи промоција на прирачникот „Како се оди во Париз“, од домашната авторка Јана Мишо позната по нејзините два романи „Анаис од Монмартр“ и „Скоро парижанка“. По промоцијата на Јана, следува и потпишување на сликовницата „Ѕвездено дете“ од Ване Костуранов во 17 часот.

    Покрај овие настани, паралелно на 5 мај во МКЦ, ќе се одржи промоција на книгата што сите ја чекавме со нетрпение, „Приказни за добра ноќ за бунтовни девојчиња“, како дел од фестивалот „Прво па женско“.

    Гости на саемот оваа година ќе бидат и писателката за деца Билјана Црвенковска и стрип-авторот Здравко Гиров, по повод промоција на нивната нова книга за деца „ТКЦП: Канџа во мракот“, на 7 мај со почеток во 17 часот.

    Од новите наслови што ќе бидат промовирани во рамките на саемските денови, ја издвојуваме и промоцијата на книгата „Загадочни приказни“ од авторот Урош Петровиќ на 7 мај во 18:30 часот. Покрај промоција на книгата, Петровиќ ќе одржи и две работилници за деца во рамките на саемот.

    На последниот ден од Саемот на книгата ќе биде промовирана новата збирка поезија „Реми“ (хаику) од Гето Руди и Теа К. со почеток во 18 часот.

    Програмата со активности на годинашниот саем ќе биде збогатена и со креативни работилници за деца на тема „Кралот Светкошорц“, „Исидора Мун“, како и неколку работилници во организација на едукативниот центар „Арс Ламина“. Покрај големиот број наслови, промоции и работилници, на 4 мај на штандот на „Литература.мк“ ќе се одржи и средба со претседателот на Националниот сојуз на глуви и наглуви на Република Македонија со почеток во 11 часот, по повод издавањето на првиот „Мал водич низ македонскиот знаковен јазик“, што е прво воведно претставување на дел од македонскиот знаковен јазик со интересен креативен пристап, наменет за сите генерации.

  • 26.03.2018
    „Арс Ламина“ поддршка на Меѓународната конференција за образованието по природни науки и математика

    Издавачката куќа „Арс Ламина“ ја поддржа Меѓународната конференција за образованието по природни науки и математика, која се одржа на Природно-математичкиот факултет во Скопје на 23 и 24 март 2018 година.
    Конференцијата беше во организација на Природно-математичкиот факултeт при Универзитет „Св. Кирил и Методиј“ во Скопје и Друштвото на физичарите на Република Македонија (ДФРМ), и во соработка со Сојузот на математичарите на Македонија (СММ), а со поддршка на Министерството за образование на РМ (МОН), Бирото за развој на образованието (БРО), како и на издавачката куќа „Арс Ламина публикации“.
    На конференцијата се обрати министерката за образование и наука Рената Дескоска, а учествуваа повеќе од 550 научници, професори, наставници по математика, физика, хемија и биологија. Целта на оваа конференција беше да се изведат заклучоци за состојбите во образованието преку предавања, излагања и дискусии, кои ќе се искористат за подобрување на идните стратегии и правци за престојните промени.

  • 05.02.2018
    „Литература.мк“ повторно дел од GARAGE SALE во ТЦ „Рамстор“

    Како и секоја година така и оваа, „Литература.мк“ е дел од најголемата распродажба во градот – GARAGE SALE во ТЦ Рамстор! Од 6 до 11 февруари искористете ги одличните попусти од 30 до 50% на најпознатите светски бестселери, како и на литературата за деца. Попустот ќе важи и во „Литература.мк“ на улица Македонија.

  • 03.04.2017
    „Арс Ламина“ на Саемот на книгата 2017
    Многу гости, странски автори, специјални настани и промоции, нови и атрактивни наслови, едукативни изданија и дидактички помагала, креативни работилници за деца, турнири во дидактички игри и многу други изненадувања

    Издавачката куќа „Арс Ламина“, како и досега, ќе се претстави со низа нови наслови, но и со многу промоции и специјални гости, како домашни, така и странски.

    Специјален гостин на овој саем е екс-ју легендата д-р Неле Карајлиќ. Тој ќе гостува во среда, на 5 април, во Промотивниот центар, со почеток од 18 часот, по повод промоција на неговата автобиографија „Фајронт во Сараево“ на македонски јазик. Во својата автобиографија „Фајронт во Сараево“ д-р Неле Карајлиќ, ѕвездата на „Забрането пушење“ и на „Топ-листа на надреалистите“, се открива како еден од најскапоцените инсајдери на митските југословенски приказни.

    Тој патува во спомените испреплетени со сегашноста и пред читателите се открива како сонувач, жртва, визионер и вечен извор на идеи. Влијанието на „Забрането пушење“ во тогашниот југословенски и постјугословенски контекст е огромно и во оваа приказна добиваме една поинаква перспектива на историјата на рокенролот. Искрено, топло и емотивно, со неодоливата доза на хумор по која тој е толку познат, д-р Неле Карајлиќ, зборува за тоа како почна и како заврши сè.

    Во четврток, на 6 април, со почеток од 18 часот, во Промотивниот центар на саемот ќе се одржи промоцијата на книгата „Отчукувања“ на авторите Хавиер Руескас и Франсеск Миралјес (Шпанија). Преку дијалозите пренесени во посебен и необичен формат („чет“-апликација), ова интересно четиво пренесува една приказна за вторите шанси во животот. Но, не само формата туку и спојот на овие два автора го прави овој проект навистина интересен – Руескас (Мадрид, 1987) е новинар, автор на книги за млади и воедно популарен блогер и „јутјубер“, a Миралјес (Барселона, 1968) искусен автор на повеќе романи, добитник на неколку книжевни награди, новинар, музичар – и вљубеник во Балканот.

    Гостин на саемот оваа година ќе биде и Жан Бак (Луксембург), автор на романот „Аматер“, дел од едицијата „Прошетка низ Европа“. Жан Бак е добитник на Европската награда за литература, за романот „Аматер“. Промоцијата на „Аматер“ ќе се одржи во четврток, на 7 април во 13 часот.

    Од новите наслови што ќе бидат промовирани во рамките на саемските денови, ја издвојуваме и автобиографијата на мајсторот на хуморот – неповторливиот Џон Клиз. Автобиографијата на Џон Клиз, „И така, ви велам…“, е сè она што може да се очекува од нејзиниот автор: луцидна, промислена, провокативна и пред сè – забавна историја на ѕвездата на Монти Пајтон.

    Ќе биде промовирано и продолжението на серијалот Бриџит Џонс на Хелен Филдинг, со романот „Бебето на Бриџит Џонс“, смешен и забавен дневник на една урнебесна бременост, како и романот за млади од авторката на бестселери Џенифер Нивен – „Светот на рамена“.

    Од литературата за деца издвојуваме две специјални промоции: промоцијата на романот за деца „Супервештерката, мачката и трите волшебни колачиња“ на авторката Билјана С. Црвенковска (7.4. во 18 часот), како и промоцијата на книгата „Тато, имаме приказна!“, 14 татковко-ќеркински приказни за читање и смеење на глас, од Александар и Гала Таковски (8.4. во 13 часот).

    Едукативните изданија на „Арс Ламина“ и посебните проекти ќе бидат исто така претставени преку неколку настани: работилница „Едукативни изданија и дидактички помагала: Практична примена во наставата“ (вторник, 4 април во 13 часот), промоција на изданијата на „Арс Ламина“ на Браево писмо и претставување на проектот за поддршка на деца со оштетен вид (вторник, 4 април во 17 часот), потоа посебна промоција на новите изданија од едицијата „Бајки од Македонија“, во соработка со здружението „Браво Сине“ (петок, 7 април, во 12 часот), како и претставување на програмата „Lego® Education“ (во четврток, на 6 април, во 13 часот), за која „Арс Ламина“ е застапник за Македонија.

    Во среда, на 5 април, во 13 часот ќе се одржи промоција на нови списанија за ученици – „ЛИБИ“ и „Мини ЛИБИ“.

    Покрај сите овие настани, програмата со активности ќе биде збогатена и со низа креативно-едукативни работилници за деца и турнири во дидактички игри, работилници за најмалите со пчеличката Маја, работилници „Lego® Education“, хемиски демонстрации и работилници со хемиски експерименти (наменети за учениците од 8 и 9 одделение) итн.

    Во текот на саемските денови, паралелно ќе се одвиваат и настаните во книжарницата „Литература.мк“ на ул. „Македонија“, како дел од проектот „Астрорум“. Ќе учествуваат д-р Неле Карајлиќ, Жан Бак, Хавиер Руескас и Франсеск Миралјес.

  • 13.10.2016
    Литература.мк од интернет на улица Македонија
    Книжарницата „Литература.мк“ од интернет се сели на улицата „Македонија“

    Во строгиот центар на Скопје, на најфреквентната пешачка артерија, се отвора ексклузивна книжарница „Литература.мк“, која од интернет сега се сели на улицата „Македонија“, бр. 21 (спроти спомен-куќата на Мајка Тереза).

    „Литература.мк“ постои на интернет веќе пет години, а сега ја отвора и својата прва „физичка“ продавница. Во простор од 80 m2, со врвно ентериерно уредување, книжарницата „Литература.мк“ ќе ги донесе светските книжарски трендови во Скопје и изданијата на најголемите домашни издавачки куќи, задоволувајќи го вкусот и на најпребирливите вљубеници во книгата.

    Како веќе препознатливо место за страсните љубители на книгата, вљубеници во пишаниот збор и талкачи низ бескрајниот литературен простор, „Литература.мк“ ќе понуди богата програма, разни случувања и содржини секој ден, наменети за сите возрасти и за сите вкусови: литературни и музички дружења, гостувања на домашни и на странски автори, креативни средби и едукативни работилници за најмалите читатели итн.

    „Нашата визија беше книжарница каква што вистински ù прилега на улицата ’Македонија‘, ’најважната улица‘ во Скопје што отсекогаш била симбол за престиж. Улицата ’Македонија‘ е колепката на македонското граѓанство и отсекогаш била средиштето на напредокот и на новата мисла, центар на интелектуалниот, трговскиот, па и на ноќниот живот на градот“, вели Дарко Фиданоски, еден од сопствениците на книжарницата „Литература.мк“. „Сакаме ’Литература.мк‘ да го врати тој сјај и живот на улицата ’Македонија‘, да биде сврталиште на љубителите на книгата, на случајните минувачи, на уметниците, бизнисмените, на студентите, пензионерите, на намерниците кои тргнале во саботен шопинг, на љубителите на добро кафе и добра музика“, додава Фиданоски.

    Книжарницата „Литература.мк“ на улицата „Македонија“ ги отвора вратите на 15.10.2016 во 19.30, а веќе од понеделник почнува со најавената програма и со предвидените содржини.

    „Литература.мк“ претендира да прерасне во вистинска „книжарница на Македонија“, почнувајќи од улицата „Македонија“, епицентарот на метрополата, и ширејќи ја својата мрежа низ целата земја.





  • 02.11.2015
    Онлајн ресурси на obrazovanie.literatura.mk


    Преку страницата ОБРАЗОВАНИЕ (obrazovanie.literatura.mk) ќе можете да ги најдете сите потребни материјали и ресурси првенствено во врска со предметите Математика и Природни науки во основното образование, како и мноштво дополнителни идеи за реализација на наставата.

    Покрај ресурсите за наставниците, интернет страницата нуди и бројни совети за родителите, за работа со децата и идеи за проекти надвор од училницата.

    Страницата постојано се надополнува, со помош на тимот уредници и стручната редакција, кои работат на создавање и дополнување на содржините.


  • 06.05.2015
    Арс Ламина и Literatura.mk на Саемот на книгата 2015


    Над 300 нови наслови, големи саемски намалувања, промоции и средби со реномирани автори, креативни работилници, проекции, конкурс за краток хумористичен расказ, многу настани и забава, награди и подароци – ова е само дел од она што годинава Арс Ламина публикации ќе го понуди на својот штанд на Саемот на книгата.

    Љубителите на добрата книга знаат дека на штандот на Арс Ламина и овој пат ќе ги можат да ги најдат некои од најновите светски бестселери и биографии. На годинашниот саем, Арс Либрис ќе ги претстави и најновите наслови: „Јас сум Малала“, од 17-годишната Малала Јусафсај, девојката којашто се бореше за образование и беше застрелана од талибанците, воедно најмладиот добитник на Нобелова награда за мир; „Д-р Сон“, долгоочекуваното продолжение на безвременскиот бестселер „Сјаење“ од мајсторот на хоророт и раскажувањето, Стивен Кинг; „Книга за телото“ на филмската ѕвезда Камерон Дијаз – моќен и инспиративен прирачник за секоја жена; „Девојката што го спаси кралот на Шведска“, нов, урнебесно смешен и заводлив роман на Јонас Јонасон, авторот на бестселерот „Стогодишникот кој скокна низ прозорецот и исчезна“; романот „PR“ на Александар Илиќ, виртуелна љубовна приказна во една елитна белградска PR-агенција; и многу други.

    Наши специјални гости на саемот ќе бидат српските писатели Игор Маројевиќ, автор на романот „Белграѓанки“, кој неодамна беше објавен на македонски во издание на Арс Либрис, дел од Арс Ламина публикации, како и младиот, а веќе многу успешен, писател Александар Илиќ, автор на романот „PR“, кој ќе биде промовиран токму на годинашниот саем.

    Во поглед на стручната литература. Арс Ламина веќе има изградено портфолио од над 700 стручни наслови од најразлични области, од право и економија, архитектура и градежништво, до медицина, земјоделство, информатика итн., што на саемот ќе бидат достапни со попуст и до 50%.

    Оваа година, Арс Ламина публикации исто така го прошири своето портфолио и во сегментот на детската литература, преку импринтот Либи. Покрај успешниот домашен детски роман „Што сонуваше Дедо Мраз“ на Билјана С. Црвенковска, издаден во декември 2014 година, со што како издавач го означивме влезот во светот на детската литература, на саемот Либи ќе се претстави со уште 50-тина нови детски наслови, меѓу кои и копродукциските изданија „Пчеличката Маја“, серијалите „Мачки детективи“ и „Замокот на стравот“, како и домашните изданија – серијалите „Дина и Додо“, „Матеј и Луна“ и низа забавно-едукативни изданија за различни возрасти. Во рамки на овој сегмент, на саемот ќе бидат организирани средби со авторката Билјана С. Црвенковска, како и разни забавно-едукативни работилници за деца.


  • 04.12.2014
    Новa страница на Литература.мк

    Драги пријатели, наставници, просветни работници, родители, креиравме ново место за вас - obrazovanie.literatura.mk. Тука ќе можете да ги најдете сите потребни информации во врска со програмата по математика и природни науки за основно образование поред програмата на Кембриџ, совети за родителите, дидактички ресурси за наставниците, како и дополнителни идеи и материјали за реализирање на наставата по овие предмети. Ве покануваме да ја посетите интернет страницата! Вашите мислења и сугестии се добредојдени на obrazovanie@literatura.mk